१
Advertisement
धरान: बीपी अध्ययन प्रतिष्ठानले बीपी कोइराला स्वास्थ्य विज्ञान प्रतिष्ठान (बिपी प्रतिष्ठान) धरानलाई स्वास्थ्य बीमा कार्यक्रम अन्तर्गत प्रथम सेवा केन्द्र को मान्यता दिन माग गरेको छ।
अध्ययन प्रतिष्ठानका सभापति विकास आचार्यले शनिबार साँझ प्रेस विज्ञप्ति जारी गर्दै बीमा बोर्डको हालको निर्णयप्रति गम्भीर आपत्ति जनाउँदै तत्काल सुधारको माग गरेका हुन्।
स्वास्थ्य बीमा बोर्डले बिपी प्रतिष्ठानलाई हाल केवल रेफरल सेवा केन्द्रको रूपमा सीमित राख्ने निर्णय गरेपछि धरानबासीहरूबाट चौतर्फी विरोध सुरु भएको छ। विज्ञप्तिमा धरानका बीमा सदस्यहरूले बिना रेफर सिधै बिपी प्रतिष्ठानमा उपचार सेवा पाउने व्यवस्था सुनिश्चित गर्न जोडदार माग गरिएको छ।
यसबाहेक, बीमा बोर्डले ७५ करोड रुपैयाँभन्दा बढीको बीमा रकम प्रतिष्ठानलाई नभुक्तानी दिएको भन्दै त्यसको तत्काल फर्स्योट गर्न समेत माग गरिएको छ।
विज्ञप्तिमा हाल बीपिमा सेवा लिने धरानवासीले झेल्नुपरेको झन्झटिलो प्रक्रियालाई सरल र सुलभ बनाउनेतर्फ सरकारले ध्यान दिनुपर्ने भनिएको छ।
“स्वास्थ्य सेवा मौलिक हक हो, त्यसमा पहुँच सहज, समान र सम्मानजनक हुनैपर्छ,” विज्ञप्तिमा भनिएको छ।
रेफरल प्रक्रिया झन्झटिलो हुँदा बिरामीको स्वास्थ्यमा थप जोखिम सिर्जना हुनुका साथै उनीहरूको मौलिक अधिकारमै ठेस पुगेको भन्दै विज्ञप्तिमा तत्काल निर्णय फिर्ता लिन सम्बन्धित निकायहरूलाई आग्रह गरिएको छ।
