हर्क साम्पाङ्गले गरे देश बनाउन एकजुट हुन आह्वान

गम्भीर र भावुक वातावरणमा सुरु भएको कार्यक्रममा सम्बोधन गर्दै मेयर साम्पाङ्गले समृद्ध राष्ट्र निर्माणको लक्ष्य तत्काल पूरा नहुने भए पनि निरन्तर प्रयास आवश्यक रहेको उल्लेख गर्नुभयो । “राष्ट्रको रूपान्तरण एक–दुई महिनामा हुन सक्दैन, त्यसैले लक्ष्यमा पुग्न असन्तुष्ट भएर थाक्नु हुँदैन,” उहाँले भन्नुभयो, “यो हाम्रो सन्ततिका लागि हो, हाम्रो भविष्यका लागि हो ।”

उहाँले भ्रष्टाचारमुक्त शासन, शुद्ध खानेपानीको उपलब्धता, लागुऔषधको अन्त्य, फोहोर व्यवस्थापन, सरसफाई अभियानको निरन्तरता र शासन प्रणालीमा सुधारका लागि कार्यकारी प्रमुखको व्यवस्था जस्ता मुख्य एजेन्डाहरूको बारेमा जानकारी गराउनुभयो ।

“यो आन्दोलन कुनै व्यक्तिगत नभई सम्पूर्ण जनताको हो,” भन्दै साम्पाङ्गले सबै वर्ग, समुदाय, युवा, विद्यार्थी, आमासमूहलगायत श्रमदाताहरुलाई एकजुट हुन आह्वान गर्नुभयो । “अबको आन्दोलन कसैको एक्लो प्रयासबाट सम्भव छैन,” उहाँले जोड दिनुभयो, “यो जीवनको प्रश्न हो, परिवर्तनको आवश्यकता हो ।”

कार्यक्रममा सहभागीहरूले यसलाई प्रेरणादायी, स्तरीय र मर्मस्पर्शी कार्यक्रमको रूपमा अनुभव गरेका थिए । कार्यक्रमको अन्त्यमा सहभागीहरूको अनुहारमा भविष्यप्रति आशावादी भाव झल्किएको देखिन्थ्यो ।